കോണ്‍ഗ്രസിന്റെ മുഖമായി തന്നെ തുടരാനാണോ ആഗ്രഹമെന്ന് ചോദ്യം?; രാഷ്ട്രീയക്കാരനായി തുടരാനാണ് താല്‍പര്യമെന്ന് എംപി

കൊച്ചി: രാഹുല്‍ മാങ്കൂട്ടത്തിലിനെതിരായ നിര്‍ബന്ധിത ഗര്‍ഭച്ഛിദ്ര പരാതിയില്‍ പ്രതികരിച്ച് കോണ്‍ഗ്രസ് എംപി ശശി തരൂര്‍. ആരോപണങ്ങള്‍ ഉയരുമ്പോള്‍ ചിലര്‍ രാജിവെക്കും, ചിലര്‍ തുടരുമെന്ന് ശശി തരൂര്‍ പറഞ്ഞു. അത് അവരുടെ മനഃസാക്ഷിയുടെ വിഷയമാണ്. കൂടുതല്‍ രാഷ്ട്രീയ വിവാദങ്ങള്‍ ഉണ്ടാക്കാന്‍ താല്‍പര്യമില്ലെന്നും അദ്ദേഹം പറഞ്ഞു. മലയാള മനോരമയുടെ ഹോര്‍ത്തുസില്‍ സംസാരിക്കുകയായിരുന്നു എംപി.

കോണ്‍ഗ്രസിന്റെ മുഖമായി തന്നെ തുടരാനാണോ ആഗ്രഹം എന്ന ചോദ്യത്തിന് രാഷ്ട്രീയക്കാരനായി തുടരാനാണ് താല്‍പര്യം എന്നായിരുന്നു തരൂരിന്റെ മറുപടി. കുടംബാധിപത്യത്തിനെക്കുറിച്ചും തരൂര്‍ പരാമര്‍ശിച്ചു. ഏതെങ്കിലും കുടുംബത്തെക്കുറിച്ചല്ല താന്‍ പറഞ്ഞത് എന്നും കുടുംബാധിപത്യത്തെ രാഹുല്‍ ഗാന്ധി തന്നെ വിമര്‍ശിച്ചിട്ടുണ്ടെന്നും ശശി തരൂര്‍ പറഞ്ഞു. രാഷ്ട്രീയക്കാരുടെ മക്കള്‍ രാഷ്ട്രീയക്കാരാകണം എന്ന പ്രവണത മാറണമെന്നും ശശി തരൂര്‍ കൂട്ടിച്ചേര്‍ത്തു.

രാഷ്ട്രീയം ഏതായാലും രാഷ്ട്രം നന്നായാല്‍ മതിയെന്നും ശശി തരൂര്‍ പറഞ്ഞു. രാജ്യവും കേരളവും നന്നായാല്‍ മതി എന്നതാണ് എല്ലാവരുടെയും ആഗ്രഹമെന്നും ആര് ജയിച്ചാലും എല്ലാവരുടെയും ജനപ്രതിനിധിയാണെന്നും ശശി തരൂര്‍ പറഞ്ഞു. ശുചിത്വ ഭാരതം ഉള്‍പ്പെടെയുള്ള മോദിജിയുടെ ചില പരിപാടികളെ ഞാന്‍ പിന്തുണയ്ക്കുന്നുണ്ട്. മന്ത്രിയായിരുന്നപ്പോള്‍ മന്ത്രിയായിരുന്നപ്പോള്‍ വകുപ്പിന് പുറത്തുള്ള പല വിഷയങ്ങളിലും പ്രതികരിക്കാന്‍ അധികാരമുണ്ടായിരുന്നില്ലെന്നും ശശി തരൂര്‍ പറഞ്ഞു.

'മോദി സര്‍ക്കാരിന്റെ വികസന പദ്ധതികളില്‍ മത വിവേചനം കണ്ടിട്ടില്ല. ബിജെപിയുടെ വിവേചന രാഷ്ട്രീയത്തെക്കുറിച്ച് മോദിയോട് നേരിട്ട് സംസാരിച്ചിട്ടുണ്ട്. പൗരത്വ നിയമഭേദഗതിയോട് തനിക്ക് വിയോജിപ്പുണ്ട്. മോദി സര്‍ക്കാരിനെക്കുറിച്ച് എപ്പോളും നെഗറ്റീവ് മാത്രം പറഞ്ഞാല്‍ പോരല്ലോ. പിഎം ശ്രീയില്‍ കാവിവത്കരണം കാണുന്നില്ല. സിലബസില്‍ പ്രശ്‌നമുണ്ടെങ്കില്‍ സംസ്ഥാന സിലബസ് നടപ്പിലാക്കിയാല്‍ പോരെ.' ശശി തരൂര്‍ പറഞ്ഞു.

'നിക്ഷേപകര്‍ ആത്മഹത്യ ചെയ്യുന്ന ഏക സംസ്ഥാനം കേരളമാണ്. കേരളത്തിന്റെ സാമ്പത്തിക സ്ഥിതി മെച്ചപ്പെടുത്താന്‍ നടപടി വേണം. കേരള സര്‍ക്കാരിനെക്കാള്‍ കൂടുതല്‍ വികസനം കേന്ദ്ര സര്‍ക്കാര്‍ നടപ്പിലാക്കി. യുപിഐ സര്‍ക്കാരിന്റെ പല പദ്ധതികളും മോദി സര്‍ക്കാര്‍ പിന്തുടരുന്നുണ്ട്. തൊഴിലില്ലായ്മ പരിഹരിക്കപ്പെടേണ്ടതുണ്ടെന്നും ശശി തരൂര്‍ പറഞ്ഞു.

Content Highlight; 'When allegations are raised, some will resign, some will continue'; Shashi Tharoor reacts to Rahul Mamkootathil issue